ناسٹلجیا کا اردو ترجمہ – از مشتاق احمد یوسفی

مشتاق احمد یوسفی صاحب نے ناسٹلجیا کا اردو ترجمہ کیا تھا ۔۔۔۔۔ یادش بخیریا ۔۔۔۔۔ انہی یادوں کی ایک داستان آج ایک فلم کی صورت میں دیکھی ۔۔۔۔۔ 96 ۔۔۔۔۔۔ وجے سیتھو پتی اور تریشا کی پہلی باہمی فلم ۔۔۔۔۔ فلم شروع ہوتی ہے تو پہلے ہمیں اسکول کی یادوں میں لے جاتی ہے ۔۔۔۔۔ میں نے اپنی پوری تعلیم کالجز تک صرف لڑکوں کے ساتھ پوری کی ہے ۔۔۔۔ لہذٰا کو ایجوکیشن میں میرا کبھی تجربہ نہیں رہا ۔۔۔۔۔ البتہ اسکول کی یادیں ویسے ہی میرے ساتھ جڑی ہیں ۔۔۔۔۔ جیسے رام چندر کی ۔

بہت دل چاہتا ہے کہ کسی دن اپنے اسکول جاؤں ۔۔۔۔۔ ان در و دیوار پر اپنی گزری زندگی کا لمس تلاش کروں ۔۔۔۔۔ اس سیمنٹ کی ٹنکی کی ٹونٹی سے ویسے ہی منہ لگا کر پیوں ۔۔۔۔ جیسے دس سال وہاں اپنی پیاس بجھائی تھی ۔۔۔۔۔ باسکٹ بال گراؤنڈ کے بلا وجہ چکر لگاتا جاؤں ۔۔۔۔ ۔ جب تک کہ ٹانگیں اور سانس ساتھ نہ چھوڑ جائیں ۔۔۔۔۔ کلاس کی بینچوں پر اپنے کریدے ہوئے نام ڈھونڈوں ۔۔۔۔۔۔ اور اگر کہیں قسمت سے مل جائیں تو وہیں اپنے اشکوں سے انہیں سیراب کردوں ۔

مگر ہمت ہی نہیں ہوتی ۔۔۔۔۔ اس اسکول میں میں نے کلاس سوم سے میٹرک تک ٹاپ کیا تھا ۔۔۔۔۔ آج تک سووینیر میں میرا نام شائع ہوتا ہے ۔۔۔۔۔ مگر کہیں موجودہ کسی استاد نے پوچھ لیا ۔۔۔۔۔۔ کہ آج زندگی کے استھان پر تم کہاں کھڑے ہو ۔۔۔۔۔۔ تو کیا بتاؤں گا کہ گردش حالات نے مجھ سے میرا وہ مستقبل ہی چھین لیا ۔۔۔۔۔ جس کی چمک ان در و دیوار پر کبھی رقص کیا کرتی تھی ۔۔ ۔۔۔ بس اسی شرم سے ان ستونوں سے دوری رکھنے پر مجبور ہوں ۔

البتہ کہانی کا دوسرا رخ جو محبت کے نام سے شروع ہوتا ہے ۔۔۔۔۔ وہ میرے ساتھ بعد میں شروع ہوا ۔۔۔۔۔۔ بالکل وہی گہرا رنگ ، بات کرنے میں جھجک ۔۔۔۔۔۔ صرف آنکھوں سے یکطرفہ کلام ۔۔۔۔۔ اور پھر پکڑے جانے پر نظریں چرا کر غائب ہو جانا ۔۔۔۔۔۔ محبت کسے نہیں ہوتی ، سب کو ہوتی ہے ۔۔۔۔۔ بس کوئی عیاں رکھتا ہے ۔۔۔۔۔ تو کوئی نہاں ۔۔۔۔۔ مگر کرتے اندھی محبت ہی ہیں ۔۔۔۔۔۔ سمجھتے ہیں کہ کوئی نہیں دیکھ پارہا ۔۔۔۔۔ حالانکہ بس ہمیں ہی کوئی اور دوسرا نظر نہیں آتا ۔

کسی کو صرف دیکھنا اور بس دیکھتے رہنا ۔۔۔۔۔۔ شاید آج کل کی جنریشن کیلئے عجیب ہوگا ۔۔۔۔۔ جن کیلئے ایک چھوڑ دوسری کے پیچھے بھاگنا ہی محبت ہے ۔۔۔۔۔ لیکن یہ محبت کا عشر عشیر بھی نہیں ۔۔۔۔۔۔ محبت زندگی میں بس ایک ہی بار ہوتی ہے ۔۔۔۔۔ اگر قسمت سے آپ کو مل جائے تو زہے نصیب ۔۔۔۔۔۔ ورنہ صرف سمجھوتے ہی بچتے ہیں ۔۔۔۔۔۔ سچی محبت آپ کو پانچ سال بعد دوبارہ ملے ۔۔۔۔۔ دس سال ، بیس سال ، تیس سال ۔۔۔۔۔۔ وقت تو کوئی معنی ہی نہیں رکھتا ۔۔۔۔۔۔ وہ اتنی ہی جوان رہتی ہے ۔

اس فلم میں مجھے سب سے زیادہ بیک گراؤنڈ میوزک نے متاثر کیا ۔۔۔۔۔۔ جب پہلی بار آنکھیں اقرار کرتی ہیں تو ۔۔۔۔۔ بانسری کی دھن آپ کے کانوں میں رس گھول دیتی ہے ۔۔۔۔۔۔ جب پہلی بار بچھڑتے ہیں ۔۔۔۔۔۔ تو وائلن کی کورڈ آپ کی سانسیں منتشر کر دیتی ہیں ۔۔۔۔۔۔ جب ایک ہی چمچ سے دوسرے کا کھانا ہونٹوں تک پہنچتا ہے ۔۔۔۔۔ تو پیانو کی دھن لقمے کے ہر ذرے میں اپنی محبت بکھیر دیتی ہے ۔۔۔۔۔۔ اور جب ساتھ چھوٹتے چھوٹتے پھر سے جڑنے لگے ۔۔۔۔۔ تو گٹار کا ارتعاش نئی پگڈنڈیوں کی بنت کاری میں لگ جاتا ہے ۔

کسی محبت میں غلط فہمیاں پچھتاووں کی دیوار کھڑی کر دیتی ہیں ۔۔۔۔۔ اور پھر پیچھے افسوس کے کچھ نہیں بچ پاتا ۔۔۔۔۔ کاش ایسا ہوتا تو ہم یوں کرلیتے ۔۔۔۔۔ کاش ویسا ہوتا تو ہم ساتھ ساتھ رہتے ۔۔۔۔۔۔ دوسروں کو دکھانے کیلئے خوشگوار خواب بننے لگتے ہیں ۔۔۔۔۔ اور ان کی قیمت رتجگوں کی صورت میں ادا کرتے ہیں ۔۔۔۔۔ لمس کی خوشبو ، ہمارا کل سرمایہ بن کر رہ جاتی ہے ۔۔۔۔۔ جسے ہم یادوں کے سوٹ کیس میں جمع کرتے رہتے ہیں ۔۔۔۔۔ تاکہ بعد میں کچھ پل تو خود کے ساتھ گزار سکیں ۔

کلائمکس میں وقت جدائی اتنا کٹھن دکھتا ہے کہ ۔۔۔۔۔ سانسیں رکنے لگتی ہیں ۔۔۔۔۔ اور پھر ضبط ٹوٹ جاتا ہے ۔۔۔۔۔ کیسے اس کا خیال رکھیں ۔۔۔۔۔ جو اب ہمیں میسر ہی نہیں ۔۔۔۔۔ پھر سے وہی ادھوری زندگی جینا شروع کردیں ۔۔۔۔۔۔ جو اب تک گزارتے آئے ہیں ۔۔۔۔۔ یہ وقت بھی کتنا بے رحم ہے ۔۔۔۔۔ پلٹ کیوں نہیں جاتا ۔۔۔۔۔۔ بس اس ایک موڑ تک ہی پہنچا دے ۔۔۔۔۔ جہاں ہم بچھڑ گئے تھے ۔۔۔۔۔۔ اس فلم کا ایک مکالمہ دل چیر کر رکھ دیتا ہے ۔

” میں ابھی تک وہیں کھڑا ہوں ۔۔۔۔۔ جہاں تم مجھے چھوڑ کر گئی تھی”

سی پریم کمار کی یہ فلم ایک رات میں پوری زندگی کے پٹ کھول کر رکھ دیتی ہے ۔۔۔۔۔ آپ نے اگر کبھی محبت کی ہے ۔۔۔۔۔ تو یہ فلم آپ سے باتیں کرے گی ۔۔۔۔۔ آپ کو دلاسہ دے گی ۔۔۔۔۔ آپ کے آنسو پوچھے گی ۔۔۔۔۔ اور کچھ وقت کیلئے وہ شانہ فراہم کرے گی ۔۔۔۔۔ جو اگر آپ کو پہلے زندگی میں مل جاتا ۔۔۔۔۔ تو شاید ہماری کہانی کچھ اور ہی ہوتی ۔۔۔۔۔۔ یہ فلم وقت کی محتاج نہیں اور نہ ہی تعریف کی ۔۔۔۔۔۔ یہ اس سے آگے کی بات ہے ۔۔۔۔۔۔ یہ 96 کی بات ہے ۔۔۔۔۔ جس سال میری شادی ہوئی تھی ۔۔